| چن روُزهَ حوسه رَتهَ / حناسهَ سَردِمْ |
مَنِمَ تَك وُ تَنيا / وا بارِ دَردِمْ |
| بِراروُ صَف هِيسانهَ / كُل دَس وِ سينهَ |
كارِ دُنيا مُردِنهَ / رَسمِش چنينهَ |
| توُ جانباز هَمْ شهيدي / دِ مين ديارِمْ |
تا اَبد دِ داغِ توُ / اَسرِ بَوارِمْ |
| سوُزِ دلْ ايي خوُوِروُ / كُل سي بِرارهَ |
دِ شوُ سوُ نالهَ كِنَن / تا دَمْ اِيوارهَ |
| اِ دلِ امرُو بَنال / رَت هُمْ نِشينِت |
دِ نِميا سي هميشهَ / وي سَر زمينِت |
| دَردِ وُ رَنج اوُ چَن سالَت / مَنهَ وِ ويرِمْ |
جانبازيت يا وِرِ چَش / ها سيت بَميرِمْ |
| مهِ دِ توُ ياد گِريتمْ / رَسِمْ زموُنهَ |
اِ خدا هيچ دُختري / يَتيمْ نَموُنهَ |
| توُ شهيدِ راهَ حَق / حوسه وِ نوُمِت |
تا اَبد قَسَمْ حُرمْ / مِه هِي وِ جوُنِت |
| يَك وِ يَك همهَ رَتِن / شيروُنِ زَردِمْ |
بَنالمْ دِ داغشوُ / وا آهَ سَردِمْ |
| اِ خدا توُ خالقِ / ايي كَهكَشوُني |
اِمروُ وِ دلْ دارِمْ / داغِ گروُني |
| تَنيا غَمْ هُمرازمهَ / غَمْ هُمنِشينمْ |
تَش وِر بي گُر مي كَشهَ / دِ مين دِرينِمْ |
| بَنالمْ بَگريوِمْ / دي روُزِ دلْ گيرْ |
داغْ حوسه ها دِ جوُنمْ / دلْ ميكنهَ ويرْ |
| شوُمْ غَمْ روُزمْ غَمهَ / غَمْ بيهَ كارِمْ |
بوُغز گريتمهَ نِميلهَ / دَنگي وِرارِمْ |
| دلْ سوُختهَ زياد ديمهَ / داغْ توُ سَنگينهَ |
لوُ وِ لوُ پَردهَ دِلمْ / كُل اووُ وُ خينهَ |
| مَر فَلك يادِ توُنهَ / بوُرهَ دِ ويرمْ |
سَر بِنيمْ وِ بيوُونهَ / بي كَسْ بَميرِمْ |
| بَميرِمْ سي مِرامِت / سي پيا داريت |
بَميرِمْ سي دلِ صاف / اوُ ميموُ داريت |
| مي تَرسِمْ يهِ روُ بيا / لُري وِريسهَ |
اِصالت دِ بين روُوهَ / كَسْ شعر نَنيسنهَ |
| نِزاكهَ دلْ سوُختمهَ / تا پُشتِ سينهَ |
هوُنموُنِمْ تاريكهَ / گُرگ هَمْ نينهَ |
| بِراري خوُ بَكنيت / دِ ايي زموُنهَ |
روُزگار بي اَرزشهَ / وا كَسْ نموُنهَ |
