ويرت يا     هِي  نواتهَ   /      مين تيلَكي

 وايَك    خوُنديمْ /  هَمْ   لُري وُ  هَمْ لَكي

تير  كَشيا   بَر مي  كِردِن /   بُن كوُبُن كوُ

نا شتا  حَرديِمْ  هَمهَ  موُ /  سَر   بِري جوُ

تُخمْ   اوُما   دِ    تُخمدوُ      /    نَه  بَستهَ

تيلَك  زَ  دايا   عروُ  /   دِ    بين     رَتهَ

قا طِر  گِلسِ    وِريسا    /  وا   بار  اوُما

ميروُژ    سوُريا  رَتنِي /  دِ  مين    نوُنيا

كُر   كوُچكهِ  دِ خوُموُبي / مَحفَل    كَشموُ

بي بَرين  تيلَك   زِيموُ /   سي    هَمهَ موُ

اوُ   زموُ      نهَ يخچال   بي / نهَ  كوُلرِي

نهَ  كِيك پَر   نهَ  اجُاق گاز / ماكروُ  فريِ

جا      گَلهَ    تيكهِ     پِشكل /   وا   تپالهَ

مي وَنيمْ   كِتري   سيهَ  /  وِ  سَر    چالهَ

هميشهَ   حنا    هوِ   بي /   وا   داد وُ قال

پُر  جُومي   گَنمْ    بُردِمْ   /   دَمْ   وِ  بَقال

يهِ   كيلو   اَنگير  اِيسمْ /  سي    نهارموُ

هِي ايوارَه   مي وَنيمْ  /  جوُل  وُ  جاموُ

باد   شمال   حوُنك  كنهَ /  سي خووُ شوُ

دَس  وُ   پاموُ   دَرد  مي كِرد / دِ وِرِ توُو

هَر   ايوارهَ   پيايا  /   سي   زمي     بَر

نوُوِنمْ   گِن بَر با يهَ  /    يا    تِليش    بَر

هَمهَ  موُ   تير   گريتيمْ     /  چوُنهَ  خَرهَ

اِشكنياموُ   چَپ  وُ  راس /   بُن  كوُ  بَرهَ

مُرداد   رَت   تيلَك  خلاص  / پا ديواريا

بَشينيمْ   تا   دِروِ    بيا    /   وا    مِنجِليا

آذر  ماهَ   دِروُ   سَخت   بي / دِ اوُ سَرما

پيا   وا   بلَنگ  كنهَ   /      اوُ    جاجِيما

وا روُوِي  دِ  خَرمنِجا / غوُش كَش بيِري

كوُخهَ   سي  شوُ  بَوَني  /   نوُوهَ    بِيري

حوُشك  كِني  چَلتوُ قيا نهَ /  سي  مَكينهَ

نِصفي   سالِمْ   دِرايهَ   /   نِصفي    چينهَ

وا  تَشِ      بِرابَلي   /   شوُلهَ     ما شي

تا كه   وَقتي  مي حَردِيمْ / تَرچين    آشيِ

وِنوُكه     تيلَك     زَنهَ  /    اوُ     روُزگار

وا   كلَهشير   وِريسان /  دوُ  دلْ  شوُگار

اِ    دوُسِ   هاي  وِ    كُجا / سوُختمْ دِ  داغِت

چي  مَجنوُن دِ كوُ وُ دَشت /  گَردِمْ   سراغِت

ليزهَ   مهِ   طاق    بِرمتِهَ /   دِش  ليز     بِيرِمْ

غاپوُرِمْ    زلفِ   توُنهَ /   دَس   دِش    بِيرِمْ

اَر  بِهاي   تَركمْ      بَكي /    گُنامْ   پا   پيچِت

خوُت   دوُني  سي   توُ بيمهَ / ليوهَ وُ  شيتِت

دلْ   مِيارِمْ   وِ   دَر    حوُنَت   /   توُنهَ   بِينمْ

حوُلِمي   چي   درويشي /   وِ   تِيت   بَشينمْ

دَرويشمْ   خير   سيمْ   بيار /   سِيلي  دِ چَشتِ

لَرز   ها   وِمْ   گرمْ   بَكنمْ  /   دَسمْ   وِ تَشتِ

آروُمْ   با   دلِ   فَقير /     دِ     طاقِ     سينهَ

حَد   وُ   مَرزي  عشق نارهَ / رَسمِش  چنينهَ

زنيي   بي   عشق   توُ /   چي     يخِ   سَردهَ

توُ   بيا   گَرمِش   بَكوُ    /      بهارِمْ   زَردهَ

هَر   سَري   عاشق   نوُوهَ /   خوُوهَ     بَميرهَ

بي   عشق   وُ  بي عاشقي / كَسْ جوُ نگيرهَ

عشقِ   مِه    جِمالتهَ /   اِ   دوُس   يهِ    رَنگ

توُ   بيا   تَركمْ    نَكوُ /   دلْ  سيت  بيهَ تَنگ

دِلكَمْ         سي      ديينِت    /    دوُ   اِنتظارهَ

سَر    بَكَش   وا   ديارش /   بي   توُ  بيمارهَ

اِيقدر   فال   چهل   سرُو   /   وَنمْ   وِ   تَزبي

سَر   وُ   ريش   دِ   داغِ  توُ / كُل بينهَ اِسبي

دِلكَمْ   چي   تاف   اووُ   /   دايمْ    دِ     لَرزهَ

دريچَش    كَژاووُ   گريت  /  چي  گياهَ  هَرزهَ

ديري   توُ   چي   بَرف   كوُ /   كِردهَ  اَسيرِمْ

بَشينمْ   ري  وِ   اَفتووُ     /   سير   بَگريومْ

چي   درختِ   بي ثَمرَ     /    ريزسهَ    بَرگمْ

دَس   دِ   دوُسيت    نَكَشمْ /   تا  روُزِ  مَرگمْ

دوُس   خوُ   دِ   گفتگوُ /   سي  روُزِ    تَنگهَ

هَمدلْ   وُ   هُمدَمِت   با    /     دُنيا    قشَنگهَ

وِلاتي   كه دوُس ها دِش /   هِي چي    بهشتهَ

اوُ سوُوزهَ   بالا   بلَنگ /   دلْ   وامْ   نِهشتهَ

بَميرِمْ   سي   تَشِ   وُ  تَژگاهَ / كِيوِنوُيا

 كُجا  رَت  اوُ  شَنگ قطار /  تفَنگ   بِرنوُيا

كاسِمسا  بَر مي كِرديمْ  /راسا  وِ  راسا

 چنوُ   روُزي  دِ    نمِيا    /   دِ   مي  وِريسا

اوُسنوُ   هَر   ايوارهَ / گَلهَ    وِ   دوُ  بي

 وَر وَر   مِيش    كالهَ  /  شيپهَ    موُحوُ  بي

بَميرِمْ   سي   بيلداريا   / وا شالِ  تيرمهَ

 رَنگ رَنگي سيموُ  مي بافت /   نَنَمْ   نَجيمهَ

گوشتهَ   بَهرهَ مين تِوَق /گوُسال وُ كاوُهَ

 تَش   بِليزي    وِر   كِرديمْ  /   ليلهَ     كووُهَ

بَميرِمْ  سي  اوُ  زموُ / سي سوُوز  لوُني

 حال   خَوَر  وا  يَك  كِرديمْ   /  وا  مهربوُني

سازِ   شادي   دوُوَتيا  /سَر چوُپي  گيري

 شكارچي  اوُ   روُز  كُشتَه  /   پازَنِ    پيري

اَسبِياكهِ     كُمِيت  كَژَل /  وا زينِ  روُسي

 كِينويا    بال    وِرزيهَ   /   پاتيل       مِسي

كُجا   رَت  اوُ  خَرمِنجا  /  وا  اوُ   بِيازي

سوُاروُ   اوُمان   مينِش  /   كِردِن    وِ بازي

نهَ   سوُار  نهَ   تفَنگچي /   ني   دِ ديارِمْ

اوُ   زموُ     اوُ     روُزگار  /   وِ  ياد  بيارِمْ

صدا   سازِ  شَمسَعلي /  پيچس  دِ صحرا

هَمهَ  موُ   دَس   گريتيمْ / دُختر   وُ     كُريا

دوپا   وا شوُنهَ  شَكي / اوُ   سَنگي سَما

نالهَ   كِل   خوُوِر   دوُما  / دِ   دلْ     وِريسا

سيت بِيارِمْ چيت وُ جا / هِي ها  وِ  ويرِمْ

كُجا رَت  كي  چني   كِرد / كه  دِ  شوُ ديرِمْ

كُجا رَت اوُ   گُل وَني /   آژيهَ    هَر  سين

كوُلنجهَ  پيل اَحمهَ شاه / جوُمَكهَ  چين چين

دير  دِ  غَمْ زنيي كِرديمْ / سي اوُ   زموُنهَ

هَر  چي   مَن  سي هَمهَ بي / بِرار  واروُنهَ

مي تَرسمْ    روُزي    بيا / فَرهَنگ بَميرهَ

هيچ   كُري   حاضر نوُوهَ /دَس بوُوَش  بِيرهَ

دلِ   لُر   پاك  وُ   زلال  /  چي   آسموُنهَ

تا      اَبد      فَرهَنگِ   لُر  / سَر  پا   بَموُنهَ

خوُزسوُ    دشَتِ   كُهَن /  جاكهِ    شيروُنهَ

مَردِمِش   قديمْ    سوُار /  هَمْ    لُر   زبوُنهَ

ساكِنهَ دِ   شهرِ شوُش /   ميموُ      نوازهَ

روُز   جنگِ   برنوُ وِ دَس/ دُشمهِ  مي تازهَ

شَنگ  قطار  پيا سَگوَن/ تير دو    رديفهَ

خوُش   تَنيا   دهَ دِ دُشمهِ / دِ  جَنگ  حريفهَ

اَسبِ اوُ   اَسبِ   كرُوش  /     تفَنگِ بِرنوُ

مي كُشهَ   دِ   سَرِ    زي  /    آهوُنِ  وِ دووُ

غيرَتي    ميموُ    نواز   / وا  دلِ  صافِش

جوُنِش فدا    مي كهَ /  سي  اووُ وُ   خاكِش

وِ   يادِ   قديمْ   سوُار /   قوُمْ   لُر   زبوُنمْ

سَرزمينمْ   دوُس   دارِمْ /    بيشتر  دِ جوُنمْ

شهرِ شوُش    شهرِ   كُهن / تاريخ نوُشتهَ

اوُ   حَرمْ   دانيال   نبي  /   هِي چي  بهشتهَ

شعرِ لُري      نوشتمْ /     دي    سَرزمينمْ

رَسمْ   لُر   حَماسيهَ        /   مَنهَ   دِ  خينمْ