|
آخمِ سی نمَد / ضد رطوُبت
|
سی ساختن او / وا بَکی دقت
|
|
نمَد دِ پشم میش/ بیشترش بَرگن
|
بوُنش وی زمی/ سر خاک وُ سر شن
|
|
کار نمَد بافی / هنر لُرسوُ
|
حوُنمِ صحرا بی/ دِ مین اوُو سوُ
|
|
جمع بیهَ نمَد / موُکت اوُمایهَ
|
تا دَس نی قدش/ خاک دِش درایهَ
|
|
کُهن پیایا / یهَ کار شوُ بی
|
زور زیادی هاس / کار مُچ شوُ بی
|
|
دوُ عروُسیا / نمَد زیر پاموُ
|
اوُسنیا رسم بی / دِ مین ولاتموُ
|
|
هنر دَسی بی / دوُمین دیارمِ
|
سبُک وُ نرم بی / سی مال وُ بارمِ
|
|
نمَد سی زیر پام/ فرجی دِ کوُل
|
ایسهَ سیل کنمِ / ولات مَنَه چوُل
|
|
آخ سی گردلهَ / سی زیر زینمِ
|
همه جمع بینهَ / سوُختهَ درینمِ
|
|
سی دَردِ پایاموُ / نمَد می ونن
|
کوُفتش می وِرچی/ وِشوُ می وَنن
|
|
و کار موُ می حرد / نمد همه جا
|
کار کشاورزی / بیشتر دِ حوُنیا
|
|
هیچ وجا نَمَن / رسم قدیموُ
|
بار کِردن رَ تن / حوُز که نریموُ
|
|
نمَد تو رَ تی / هیشتی مو تنیا
|
هَر جا که هیسی/ یادت و خیر با
|
|
نمَد مهِ سیقهِ / نقش وُ نگارت
|
نوُم کُجا رَ تی / کی کِردهَ بارت
|
|
نمَد تو رَ تی / شادین بُردیهَ
|
کی بی قاتلت / چنی مُردیهَ
|
|
شاعر نوشتهَ / منظوری نارمِ
|
دی موُکت گنهَ / خیلی بیزارمِ
|
