| يادِتَه بازي بَچوُ / مين خاكِلوُنيا |
چَني خوُ بي شوُمايي / وِ سَركورينگيا |
| هِي نواتهَ دُختروُ / وِ پُشتِ حوُنهَ |
سا كوُلا نان وُ خَمير/ مي كِردِن چوُنهَ |
| دالِكهَ بيا سيمْ بَكوُ / چزنَك رغوُني |
نهَ دينمْ نهَ دِ مِيا / چنوُ زموُني |
| كُجا رَت اوُ هُمسايي / حوُنهَ يَكيموُ |
آخمْ سي گَلهَ وُ بِرهَ / اوُ دو پايموُ |
| دوُوَيتا چي اوُسنوُ / شَهوا كوُ نارهَ |
دَس بِيري جوُ گَنمِي / ماهَ وُ آسارهَ |
| سلامِمْ وِ پيل چووُي / وِ خَرمِنجايا |
سلامْ وِ آشير داری / قديمْ پيايا |
| بَميرِمْ سي دووُرهَ هووُ / قاتِروُن حيلهَ |
نِصفِ شوُ اوُ كِل وُ كشت / جُفنهَ وُ كِيلهَ |
| ها وِ يادِمْ تِرازي / وِ شوُنِ عاشوُر |
كُجا رَت اوُ خانِ گَپ / سي اوُ هَمهَ زوُر |
| ني د اوُ تِرازييا / دو كَفهَ زَنبيل |
دَسَكيش چوُ دارتيت / خَراتوُن دِسبيل |
| بَميرِمْ سي شَل كَشي /اوُ گَنمْ سي داس |
يادِتهَ زِعير كِردِن / درويش مير عباس |
| كُجا رَت اوُ رضالي / دفتر وِ دَسِش |
كُجا رَت اوُ كَدخدا / سوُارِ اَسبِش |
| پوُرس وُ پوُ چي قديموُ / گِريوهَ نارهَ |
نهَ كَسي سيك مي زنهَ /نهَ بوُنگ وِرارهَ |
| آخمْ سي شُري دُري / اوُ بازيياموُ |
جوُزوُ قوُوُ مي كِردِيمْ / دِرِس جوُمياموُ |
| وَقهَ اوُما بَزروُ / زَنگِ حَلوُرهَ |
دَنگ وِرار كُر بيارهَ / دو دِنوُ دارهَ |
| آخمْ سي مَش گوُطلا / بوُوِرهَ كيوُوَش |
بَميرِمْ سي پيچ پيچيا / اوُ سَرِ وُ صوُوَش |
| كُجا رَت چَرهَ گِروُ / وِ مين كوُرينگيا |
زورِ بازوُ كهكَشي / سي اوُ جووُنيا |
| دِ نمِيا چي اوُسنوُ / وِ دووُر يَك بايمْ |
شادي شيوَن سي هَمهَ / دوُسداريَك بايمْ |
| آخ دِ دَس ايي زموُنهَ / اِيقهَ نامَردهَ |
غَمْ وُ غُصهَ روُزگار / مين دِلمْ حَردهَ |
| نوشتمْ شعر حَقيقَت / دوُ خاطراتمْ |
گَردِش چَرخ زموُ / جَمع كِرد بِساطمْ |
| هني هَمْ بَدتِر بوُوهَ / رَسمْ وُ رِسوُمات |
روُزِ پيشي وِ سِرَمْ / تاريك وُ ظُلمات |
| دوُ قديمْ بهترموُ بي / تا ايي زموُنهَ |
كَسي ديوارِ نمي وَن / وِ دووُرِ حوُنهَ |
