دالكه

دِ پاكي دلْ دالكَمِ / چي آسموُنهَ	مهِ گوُتمِ اوُ نَميرهَ / وِ تِيمِ بَموُنهَ
اوُ چنوُ گَپمِ كِردهَ / وا شير پاكِش	تا اَبد مُريدِشمِ / هِي هامِ وِ يادشِ
سايهَ بوسيش بَسازمِ / دِ خشتِ جوُنمِ	چار ستوُنِش بَزنمِ / مَغزِ سخوُنمِ
گروُنهَ داغْ دالكَمِ / رُخسار زَردمِ	چي دماوَن سَنگينهَ /ايي بار دَردمِ
گوُتنهَ كه اوُ بِهشت / وِ زيرِ پاتهَ	جوُنكهِ خوُمِ وِسيقهَ / هَردِك تيياتهَ
اوُ آوا لاي لايت / مَنهَ وِ ويرمِ	توُ رَتي صَفان بُردي /هاسيت بَميرمِ
چه وِ كوُل چه وِ بَغل / تا پا بِيرمِ	دِ وَقتِ پيريِ اوُ / مهِ دَسِش بِيرمِ
پاي پاي مِي كِردمِ / اوُ وَنمِ وا رَه	روُز زحَمت وِ شوُ بيار / وِ پا گاوُوارهَ
شيرِ پاك توُ وِمِ دييهَ / بَكوُ حَلالمِ	دِ تهَ دلْ سي رَتنِت / مهِ هِي بَنالمِ
بَنالمِ توُ رَتيهَ / هيچ ني ديارتِ	ايي سَفَر سي توُ زي بي/تَركِ ديارتِ
كَسْ دِما كَسْ نَمُردهَ / خوُمِ سيت بَميرمِ	دِ داغِت ليوهَ بيمهَ / ها كوُ بِيرمِ
بَغل بَغل وِمِ كِردي / تا بيامِ نِزيكتِ	سِيل كِنمِ جوُنمِ درا / حوُنهَ تاريكِت
يا علي وِمِ مِي گوُتي / تا مهِ وِريسمِ	دَسيامِ وِ دَستِ بي / تا راس بِحسمِ